अप्ठ्यारोमा परेका नुवाकोटवासीलाई जीपी कोइराला फाउन्डेसनले निःशूल्क जिल्ला पठायो

काठमाडौं, १४ बैशाख । पाँच सातादेखिको लकडाउनका कारण राजधानीमा अलपत्र परेका नुवाकोट वासीलाई घर फर्कन सघाउने उद्देश्यले गिरिजाप्रसाद कोइराला फाउन्डेसन नुवाकोटले काठमाडौं देखि नुवाकोटका विभिन्न स्थानसम्म निःशूल्क यातायातको व्यवस्था गरेको छ ।

नेपाली कांग्रेसका युवानेता तथा महासमिति सदस्य रमेशकुमार महतको क्रियाशीलता र जिल्लाका स्थानीय तहहरूसँगको समन्वयमा फाउन्डेसनले सञ्चालन गरेको निःशूल्क यातायात सेवा अन्तर्गत आज काठमाडौंका बौद्ध, महाराजगन्ज, सामाखुसी, माछापोखरी, नयाँ बजार, कलंकी लगायत स्थानबाट झन्डै एक दर्जन बस नुवाकोट पठाइएका छन् ।

लकडाउनसँगै लामो समय व्यापार, व्यवसाय र रोजगारी बन्द हुँदा काठमाडौंमा अस्थायी बसोवास गरिरहेका हजारौं नुवाकोटवासीको समस्या दिनानुदिन जटिल बन्दै गएको अवस्थालाई मध्यनजर गरी घर फर्किन चाहनेका लागि निःशूल्क यातायातको व्यवस्था गरिएको कांग्रेस युवानेता रमेशकुमार महतले बताए ।

जनताप्रतिको उत्तरदायित्व बहन गर्ने सन्दर्भमा विगत देखि नै आफू निरन्तर लागिपरेको स्मरण गर्दै नेता महतले जस्तोसुकै परिस्थितिमा पनि आफ्नो दायित्व पालनामा नचुक्ने प्रतिबद्धता व्यक्त गरे । फाउन्डेसनका जिल्ला अध्यक्ष रमेशकुमार पाठकले यो विषम परिस्थि तिमा जनतालाई राहत दिने कार्यमा राज्यले प्रभावकारी भूमिका निर्वाह गर्न नसकेको अवस्थामा आफूहरू जिल्लावासीको पीडामा मल्हम लगाउने प्रयासमा जुटेको बताए ।

अध्यक्ष पाठकले फाउन्डेसनको अभियानमा नैतिक वा भौतिक साथरसमर्थन दिने सम्पूर्णमा आभार प्रकट गरे। फाउन्डेसनका जिल्ला उपाध्यक्ष शिव अधिकारी अविरलले गिरिजाप्रसाद कोइराला फाउन्डेसनले सबै जिल्ला र स्थानीय तहसम्म फैलिएका समितिहरू मार्फत देशैभर मानवसेवाको अभियान चलाइरहेको भन्दै कठिन घडीमा फाउन्डेसनको क्रियाशीलता अझै बढी रहने बताए ।

प्रतिक्रिया दिनुहोस्